Fizika Statistike dhe Termodinamika

Fizika statistike është njëra nga pjesët më të rëndësishme të fizikës teorike. Ajo studion
sisteme me numër të madh grimcash, si gazra, lëngje, trupa të ngurtë. Së bashku me
termodinamikën fizika statistike zbatohet në fizikën e molekulave, fizikën e trupit të ngurtë, kimi,
biofizikë, teknikë etj.
Si fizika statistike, edhe termodinamika studiojnë dukuri të kushtëzuara nga bashkëveprimi
dhe lëvizja e pandërprerë e numrit të madh grimcash, nga të cilat përbëhen sistemet që
shqyrtohen. Këto disiplina shkencore studiojnë formën termike të lëvizjes së materies dhe ligje e
saj specifike. Dallimi ndërmjet tyre qëndron në metodat e studimit. Ndërsa termodinamika
studion cilësitë e përgjithshme të sistemeve fizike nga ana energjetike. Fizika statistike niset nga
përftyrime molekulare mbi ndërtimin e këtyre sistemeve.
Interpretimi statistik i ligjeve të termodinamikës përcakton kufijtë e përdorimit të tyre. Përshkrimi
termodinamik i vetive të sistemit bëhet me ndihmën e madhësive si: vëllimi,shtypja, temperatura,
energjia e brendshme, entropia etj. Këto madhësi quhen madhësi të gjendjes ose parametra
termodinamikë. Parametrat termodinamikë mund të jenë parametra ekstenzivë dhe intenzivë.
Parametra ekstenzivë janë energjia e brendshme e sistemit, vëllimi, entropia etj. Veti e
përbashkët e këtyre parametrave është ekzistimi i raportit linear ndërmjet sasisë së substancës
dhe vlerës së këtyre parametrave. Ky proporcionalitet nuk vlenë për parametrat intensiv. Vlera e
parametrave intensiv është i pavarur nga sasia e materies. Parametra intensiv janë
temperatura, shtypja etj.
[...]